Torsk (Gadus morhua).
Fotograf: Erling Svensen / HavforskningsinstituttetPublisert: 09.10.2026
Det internasjonale havforskingsrådet (ICES) gjev eit todelt kvoteråd for nordsjøtorsk i 2027, som i 2026.
Forskarane rår om nullfiske av torsk i Nordsjøen og nærliggande område eller at fangstane ikkje skal vere meir enn totalt 8 574 tonn. Dei nærliggjande områda er vest for Skottland, Skagerrak og den austlege engelske kanal.
– Det er krevjande å forvalte tre underbestandar under eitt, og dette vert reflektert i det todelte rådet, seier havforskar Bjarte Bogstad. Han er HIs representant inn i ICES.
Begge dei tilrådde kvotene for 2027 er langt under forventa fangst i 2026.
Torsk i Nordsjøen er delt i tre underbestandar. Desse gyter på separate felt: Nordvest, sør og «viking» (nordaust) i første kvartal. Elles i året blandar fisken seg og vert fanga om ein annan.
– Fisketrykket i 2025 var for høgt for torsk i Nordsjøen. Hos alle tre nordsjøtorsk-bestandane er gytebestanden i år under føre-var-grensa, seier Bogstad.
Forventa fangst i 2026 er 21 131 tonn, inkludert utkast på 3 791 tonn. Dette er høgare enn kvoten for 2026 på 14 035 tonn, summert over alle områda.
Storbritannia, Danmark og Noreg er dei viktigaste fiskerinasjonane på torsk i Nordsjøen. Norsk kvote for 2026 er 1 516 tonn.
For den sørlege bestanden og nordvest-bestanden er gytebestanden også under det kritiske nivået, der ein forventar at bestanden får redusert evne til å lage nye, sterke årsklassar.
Viking-bestanden er mellom føre-var-nivået og kritisk nivå.
Dersom ein ser dei tre bestandane under eitt og brukar ei MSY-tilnærming saman med «føre var»-omsyn, bør det vere nullfiske på nordsjøtorsk i 2027.
MSY står for Maximum Sustainable Yield, på norsk maksimalt langtidsutbytte. Ei MSY-tilnærming handlar om å maksimere langtidsutbyttet frå ein bestand, samtidig som fisket framleis er berekraftig.
Dersom ein brukar «føre var»-omsyn berre på torskebestanden i sør – som har vore den svakaste – seier kvoterådet at ein kan fiske opp til 3704 tonn for nordvest-bestanden og 4870 tonn for viking-bestanden. Totalt blir dette 8 574 tonn.
– To av tre torskebestandar i Nordsjøen er no under kritisk nivå. All fiske vil føre til at det er høgare risiko for at desse held seg der, seier Bogstad.