Over tre grader varmare enn normalen rundt Svalbard

Årets sommar har bydd på kontrastar. 

Vestlendingane opplevde marin kuldebølgje, medan det på Svalbard har vore rekordvarmt: 

– I juli var havoverflata rundt Svalbard meir enn tre grader varmare enn normalen, seier oseanograf Randi Ingvaldsen. 

Nokre av dei raskaste og kraftigaste klimaendringane på kloden skjer nettopp i Barentshavet. Havområda rundt øygruppa vert oftare enn før påverka av marine varmebølgjer.

Her er havforskarane no på tokt for å kartlegge tilstanden til økosystema. 

Vilkåra endrar seg

Det internasjonale økotoktet er eit årleg tokt, som har føregått sidan 2004. Over seks veker, dekkjer fire forskingsfartøy Barentshavet frå topp til botn, og samlar inn enorme mengder data. 

Data vert brukte inn i ressursrådgjevinga for kommersielt viktige bestandar som nordaustarktisk torsk (skrei), lodde og norsk vårgytande sild. 

Samtidig går dei inn i forskinga og forståinga vår av klimapåverknad og dei komplekse samhandlingane og prosessane i økosystemet. 

– Stabil og systematisk datainnhenting er meir verdifull enn noko sinne, sidan vilkåra i havet er i endring, seier toktleiar Elena Eriksen. 

– Dei oseanografiske målingane våre frå Barentshavet byggjer på meir enn 100 år gamle dataseriar. Dei lengste biologiske dataseriane våre går heilt tilbake til 1950-talet. 

Rådata frå hav til land

For første gong, kan også årets økotokt sende sanntidsdata direkte til land. 

– Rådata frå ekkolodd og frå trålmonitorane vert fortløpande sende og lagra i skya. Der kan brukarane kvalitetssikre og analysere dataa i nær sanntid, seier toktleiaren. 

– Dette er eit viktig steg i HI si digitalisering, og i arbeidet vårt for å sikre at dataa våre er aktuelle og tilgjengelege. 

• Les også om kvifor fjorårets brislingtokt var ein gamechanger: Frå bereposeteknologi til sanntidsdata.