Dr. Fridtjof Nansen er vel framme i Colombo

Oppdatering torsdag 12. mars 

I løpet av natt til torsdag kom Dr. Fridtjof Nansen vel fram til hamna i Colombo.

Oppdatering fredag 6. mars. 

Forskingsfartøyet Dr. Fridtjof Nansen er på veg til Colombo, Sri Lanka. Skipet vil truleg komme fram midtvegs i neste veke. 

Det blir no planlagt for at forskingsfartøyet vil kunne starte opp vitskapeleg arbeid i området rundt Sri Lanka så snart som mogleg etter dette. 

Alle som er på  Dr. Fridtjof Nansen blir ivaretatt om bord og ved ankomst Colombo. Havforskingsinstituttet samarbeider med, mellom anna, Sjømannskyrkja for å sikre god oppfylgjing. Det vil også vera eit tilbod på plass ved behov etter heimkomst til Noreg.

Saka er oppdatert torsdag 5. mars 

Krigshandlingane i Midtausten har ført til at den andre delen av toktet til forskingsfartøyet Dr. Fridtjof Nansen i Oman er innstilt.

Fartøyet skulle etter planen gått ut på tokt frå Muskat laurdag, vidare sør- og sørvestover, for så å ende i Salalah etter omlag fire veker. 

Tysdag blei det bestemt at forskingsfartøyet reiser frå Muskat. Skipet reiste natt til onsdag. 

– Dr. Fridtjof Nansen går til ei hamn utanfor området med høg sikkerheitsrisiko, sa rederisjef Inge André Utåker.

– Vi tok denne avgjerda utifrå ei totalvurdering av sikkerheitssituasjonen i området, og i samråd med Norad, FAO og Utanriksdepartementet. Det er på noverande tidspunkt ikkje mogleg å seia når skipet kan ta opp igjen den planlagde tokt-aktivitet i Oman. 

Dr. Fridtjof Nansen er utleigd, via FN-organisasjonen FAO, til omanske styresmakter, for å kartleggja fiskeriressursane langs kysten av Oman.

Forskingsfartøyet er eigd av Norad og blir drifta av Havforskingsinstituttet. Primært blir Dr. Fridtjof Nansen nytta i «Nansen-programmet», eit samarbeid mellom HI, Norad og FAO.