Tilrår kvote på 181 tonn for Jan Mayen-torsk

Etter to år med fiskestopp, rår havforskarane om at det igjen vert opna for kartleggingsfiske av torsk i fiskerisona ved Jan Mayen. 

Havforskarane rår om at fangsten ikkje overstig 181 tonn. 

Kan vere ein eigen bestand

Kvoterådet er basert på ei føre-var-tilnærming og på fangstmengd i 2021-2023. 

– I rådgjeving for torsk ved Jan Mayen lyt ein vege verneomsyn opp mot omsynet til å utnytte ressursen, seier bestandsansvarleg Bjarte Bogstad.  

Tidlegare forsking frå Havforskingsinstituttet (HI) har synt at det i nokre år vert verande nok torskeyngel kring øya til at desse kan vere ein eigen bestand.

Kartleggingsfiske for å overvake bestanden

Datagrunnlaget for torsk ved Jan Mayen kjem frå kartleggingsfiske og tidsserien med data er kort. Kartleggingsfiske med line vart gjennomført årleg i perioden 2019-2023. 

Havforskarane reknar kartleggingsfiske med same metodikk og liknande omfang som tidlegare som den einaste praktiske måten for å overvake bestanden.

– Kor ofte ein bør gjennomføre eit slikt kartleggingsfiske for å unngå tapt utbytte, er vanskeleg å seie eksakt, men bestanden er såpass langliva at kvart tredje år bør vere tilstrekkeleg.  

I tillegg rår forskarane om at det som i tidlegare år vert innført ei avgrensing for bifangst av torsk i blåkveitefisket i fiskerisonen ved Jan Mayen. 

Rådet er sendt til Nærings- og fiskeridepartementet.