Over 300 artar til no

– Vi har registrert 304 ulike artar frå pelagisk trål og botntrål til no, fortel havforskar Johanna Myrseth Aarflot. 

Ho har nyleg gått i land etter å ha fullført ei etappe på  «G.O. Sars» under haustens økosystemtokt i Barentshavet. 

Toktet – og artsregistreringane – går vidare. 

1/5

Går nordover

No er dei tre norske forskingsfartøya i økotoktet på veg lenger nord – rundt Svalbard og ut i det sentrale og nordlege Barentshavet. Tidlegare har dei dekt sørlege og sørvestlege deler. 

– Ein stasjon på økosystemtoktet tek heile fire timar å gjennomføre, på grunn av alt utstyret som skal i sjøen og alle prøvene vi tek, seier Aarflot. 

Overvaking av fiskebestandar

Data frå toktet vert brukt inn i bestandsvurderinga av fleire av dei viktigaste kommersielle fiskebestandane i Barentshavet. 

Toktet er særleg viktig for overvaking av loddebestanden. 

– I 2025 var den modnande bestanden på det lågaste nivået vi har målt for lodda sidan 1995, seier havforskar Georg Skaret. 

Difor tilrådde forskarane fiskestopp for 2026, som for 2025. 

Lodda i Barentshavet er ein kortlevd bestand – ho lever sjeldan meir enn fem år, og døyr like etter gyting. Difor kan bestanden også variere kraftig frå eit år til neste. 

Basert på målingane frå i fjor ventar ein låge nivå av lodde i år, men historia har synt at bestanden har ein sterk tendens til å kome seg att over tid.