Økosystemtoktet: Beskjedne registreringar av lodde i Barentshavet
Lodde blir prøveteke med trål og kyndig behandla i laben. Her ved Else Holm (frå venstre), Frøydis Rist og Pia Smit.
Fotograf: Georg Skaret / HavforskingsinstituttetPublisert: 05.10.2026 Oppdatert: 07.10.2026
«Johan Hjort» er nettopp ferdig med overvakinga av dei nordlegaste delane av Barentshavet, og «Helmer Hansen» er i ferd med å avslutte sin del av årets økosystemtokt. Med dette er dei viktigaste beiteområda for lodde på norsk side dekka, og desse er også viktige fødeområde for mellom anna torsk og knølkval.
– I fjor var det lite lodde, også av den umodne sorten. Det var derfor forventa beskjedne mengder av lodde i år, og observasjonane frå årets tokt er i tråd med dette, seier toktleiar Georg Skaret. Han er òg bestandsansvarleg for lodde hos Havforskingsinstituttet.
Som i fjor var det små mengder i dei nordlege delane av hovudbeiteområdet på Storbanken (sjå kart), kor det normalt er godt med lodde.
Kart: Havforskingsinstituttet
Russarane dekker beiteområda i aust, og melder om små mengder lodde også der.
Lodda er favoritt-retten til fleire andre artar
Lodderekrutteringa har vore svak i fleire år.
– Den svake rekrutteringa kan ha samanheng med dei store mengdene norsk vårgytande sild (NVG-sild) som har vore i Barentshavet dei siste åra. I tillegg til å konkurrere med lodde om maten, beitar NVG-sild direkte på loddelarvar, seier Skaret.
Mange artar i Barentshavet har lodde som ein viktig del av dietten, særleg torsken. Historia har vist at låge loddemengder kan føre til redusert vekst hos torsken.
– Lengde og vekt av 3-5 år gammal torsk har gått merkbart ned frå 2024 til 2026, og lite lodde kan vere noko av grunnen til dette, seier Skaret.